ТұрымбетоваАқбота
Ерболатқызы
Тұрымбетова Ақбота Ерболатқызы - философия докторы (PhD), ҚР Мемлекеттік «Дарын» жастар сыйлығының лауреаты, Астана қ. Қазақ ұлттық өнер университетінің оқу және оқу-әдістемелік жұмыстарының проректоры, домбыра кафедрасының доценті, Құрманғазы, Дәулеткерей, Тәттімбет, Қазанғап, Қ.Жантлеуов, «Шабыт» т.б. халықаралық және республикалық конкурстардың лауреаты.
2001 жылы Алматы қ. П.И.Чайковский атындағы музыкалық колледжін домбыра мамандығы бойынша үздік аяқтап, 2003 жылы сол оқу орнын фортепиано мамандығы бойынша бітірді. 2001 жылы Құрманғазы атындағы Қазақ ұлттық консерваториясының домбыра аспабына ҚР Халық әртісі, профессор Қ.Ахмедияровтың сыныбына қабылданды. 2005 ж. Астана қаласындағы Қазақ ұлттық академиясын 062141 – Халық аспаптары – Домбыра мамандығы бойынша аяқтады. 2010 ж. 6М040400 – «Дәстүрлі музыкалық өнер» мамандығының магистратура деңгейін өнертану ғылымдарының кандидаты, профессор П.Ш.Шегебаевтың жетекшілігімен үздік бітіріп, дәстүрлі музыкалық өнер магистрі академиялық дәрежесін алды. 2017 жылы Қазақ ұлттық өнер университетінің 6D040100 – Музыкатану мамандығы бойынша докторантура деңгейін аяқтады (ғылыми жетекшісі – өнертану ғылымдарының докторы, профессор У.Р.Джумакова). 2018 жылы «Түркі халықтарының аспаптық музыкасы домбыра орындаушылығында» атты докторлық диссертация қорғап, 6D040100 – Музыкатану мамандығы бойынша философия докторы (PhD) дәрежесін алды.
А.Е.Тұрымбетова 2014-2017 жылдар аралығында Ғ.Тоқай атындағы Қазан Федералдық университетінің татаристика және түркологияның Жоғары мектебінде, сондай-ақ, Н.Жиганов атындағы Қазан мемлекеттік консерваториясында (Татарстан Республикасы) өнертану ғылымдарының докторы, профессор В.Р.Дулат-Алеевтің жетекшілігімен ғылыми-зерттеу тағылымдамасынан өтті. А.Е.Тұрымбетованың мақалалары «Scopus» базасында, алыс және жақын шетелдегі және ККСОН БҒМ ұсынған басылымдарда жарияланды.
Тұрымбетова А.Е. 2005 жылдан бастап қазіргі таңға дейін Қазақ ұлттық өнер университетінде қызмет атқарып келе жатыр. 2013-2014 жылдар аралығында домбыра кафедрасының меңгерушісі, 2017-2018 жылдары ҚазҰӨУ колледж және мектеп бойынша оқу үрдісін ұйымдастыру қызметінің басшысы, 2018-2019 жылдары жоғары және жоғары білімнен кейінгі академиялық мәселелер бойынша қызметінің басшысы лауазымдарын атқарып келді. 2019-2020 оқу жылынан бастап ҚазҰӨУ оқу және оқу-әдістемелік проректоры болып қызмет атқаруда. ҚазҰӨУ домбыра кафедрасында педагогикалық қызмет атқара жүріп 40-тан аса халықаралық және республикалық конкурстардың лауреаттарын дайындады.
