Қазақ ұлттық өнер университетінің "Өнертану" (кинотану) мамандығының докторанттары – Сабина Мейрамова, Айдос Сейітжан және олардың ғылыми жетекшісі, "Өнертану" кафедрасының профессоры Смайылова Инна Тілекқызы Германияның Пассау университетіне тағылымдамадан өтетін болды. Пассау университеті білім беру бағдарламалары бойынша, әсіресе "Өнертану" мамандығы бойынша, Германиядағы алдыңғы қатарлы жоғары оқу орындарының бірі болып табылады.
Тағылымдамадан өтушілердің ғылыми кеңесшісі ретінде Пассау университетінің профессоры, танымал кинотанушы әрі ФИПРЕССИ мүшесі Биргит Беймерс тағайындалды. Ол тағылымдамадан өту бағдарламасын да анықтап, студенттер мен докторанттарға бағыт-бағдар беріп отыр.
Университетіміздің өкілдері Германия, Чехия, Австрия сияқты елдерде өтетін ғылыми семинарларға қатысып, еуропалық кітапханалардың электрондық желісіне және SCOPUS жүйесіне шығу мүмкіндігі бар кітапханада зерттеу жұмыстарын жүргізу ниетінде. Сонымен қатар, олар Берлин алдындағы 75-ші Berlinale халықаралық кинофестивалінің баспасөз конференцияларына, шеберлік сыныптарына, сұхбаттарына және конкурстық бағдарламаларына қатысуды жоспарлап отыр, бұл олардың кәсіби дағдыларын жетілдіруге мүмкіндік береді.
Ұлттық өнер университетіміздің өкілдеріне ғылыми тағылымдама барысында сәттілік тілейміз, олар өздерінің ғылыми әлеуетін арттырып, тәжірибе жинауда үлкен жетістіктерге жете алатынына сенімдіміз.
