Факультет келесі мамандықтар бойынша мамандар дайындайды:
Домбыра; дәстүрлі ән, дәстүрлі жырлар, айтыс; қобыз (қобыз, қыл қобыз, шертер); орыс халық аспаптары (баян, аккордеон, домбыра-прима, домбыра-бас, гитара); фольклорлық аспаптар (жетіген).
Факультет деканы – өнертану магистрі, Қазақстан Республикасының «Мәдениет саласының үздігі» Абенов Батырлан Әлкенұлы.
Факультеттің негізгі мақсаты – білім сапасын жоғары деңгейде қамтамасыз ету, студенттер мен магистранттардың орындаушылық шеберлігін және ғылыми-теориялық дайындығын арттыру, оқу процесін тиімді басқару және ұлттық өнерді оқытудың заманауи үлгілерін қолдану.
«Дәстүрлі музыкалық өнер» факультетінің басты міндеті – қазақ халқының музыкалық мұрасын сақтау және дамыту, Қазақстанның мәдениет мекемелері мен білім беру ұйымдарын жоғары білікті мамандармен қамтамасыз ету, олар елдің абыройын халықаралық аренада қорғауға қабілетті болуы.
Факультет ұжымдары астананың мәдени шараларына белсенді қатысып, шетелдік елдерге барып, қазақтың дәстүрлі өнерін насихаттайды. Мысалы, «Шабыт» домбырашылар ансамблі (басшысы – Абенов Б.А.) және «Сырлы саз» фольклорлық ансамблі (басшысы – Нүкей М.Б.) Қазақстан делегациясының құрамында АҚШ-тың Нью-Йорк қаласында (2018), Германияның Берлин қаласында (2018), Австрияның Зальцбург қаласында (2022), Италияның Рим, Милан, Генуя, Сан-Ремо қалаларында (2023) және басқа да елдерде концерттерін өткізді.
