«Театр өнері және өнертану» факультеті
«Театр өнері және өнертану» факультеті ҚазҰӨУ ректоры, Қазақстанның Еңбек Ері, Әлем артисі, профессор А.Қ.Мусаходжаеваның қолдауымен 2002 жылы Қазақ ұлттық музыка академиясында құрылған «Актер өнері және режиссура» кафедрасынан бастау алады. Кафедраның негізін қалаушылар: КСРО және ҚР Халық артисі, КСРО және ҚР Мемлекеттік сыйлығының лауреаты, Халық қаһарманы, театр және кино режиссері, профессор Әзірбайжан Мәдиұлы Мәмбетов, Қазақстанның еңбек сіңірген қайраткері, профессор (ЖАК) Лейло Ақназарқызы Бекназар, Қазақстанның еңбек сіңірген қайраткері, профессор Юрий Иванович Ханинга.
2010 жылы «Қазақ ұлттық музыка академиясы» жаңа мәртебеге ие болып, «Қазақ ұлттық өнер университеті» атауын иеленді. Осы жылы «Театр, кино және ТД» факультеті құрылды. Факультет үш кафедрадан құрылды: «Актер өнері және режиссура» кафедрасы, «Кино және Теледидар» кафедрасы, «Өнертану» кафедрасы.
2019 жылы факультет атауы «Театр өнері және өнертану» болып өзгертілді. «Драма театр актері және режиссура», «Музыкалық-драма және қуыршақ театр өнері», «Өнертану» кафедраларынан жасақталды. Факультеттің профессор-оқытушылар құрамы өнер және мәдениет саласындағы танымал мамандармен, ғылым кандидаттары, PhD докторлар, халық артистері, еңбек сіңірген қайраткерлер, мәдениет қайраткерлерімен толықтырылды. Бүгінгі таңда шәкірттер базалық білім алудан бөлек халықаралық және республикалық байқаулардың жеңімпазы атанып өнер кеңістігінде биік белестерді бағындырып келеді.
Түлектер өз мамандықтары бойынша 100% еңбекпен қамтамасыз етіледі. «Театр өнері және өнертану» факультетінің үздіксіз дамуы - Қазақ ұлттық өнер университеті ұжымының алдына қойған міндеттердің табысты жүзеге асырылуының кепілі.
Құрылған жылы: 2019 жыл
Декан: Қазақстанның еңбек сіңірген қайраткері, профессор (ЖАК) Ақыш Қоныртайұлы Омар
